Das alt Schulhaus an der Krick


For the linguistically inclined, below is a famous example of "the dialect." The nostalgic theme is quite typical. Very minor alterations in spelling have been made in this text to bring it more in line with the weakly developed conventions in Pennsylvania-German spelling.

[Das alt Schulhaus]

Das alt Schulhaus an der Krick

von Dr. Heinrich Harbaugh

Heit iss 's 'xaektli zwansig Jaar,
Dass ich bin owwe naus;
Nau bin ich widder lewig z'rick
Un schteh am Schulhaus an d'r Krick,
Juscht neekscht an's Dady's Haus.

Ich bin in hunnert Heiser g'west,
Vun Maerbelstee' un Brick,
Un alles was sie hen, die Leit,
Dhet ich verschwappe eenig Zeit
For's Schulhaus an der Krick.

Wer mied deheem iss, un will fort,
So loss ihn numme geh'--
Ich sag ihm awwer vorne naus
Es iss all Humbuk owwe draus,
Un er werd's selwert seh'!

Ich bin draus rum in alle Eck',
M'r macht's jo ewwe so;
Hab awwer noch in keener Schtadt
Uf e'mol so viel Freed gehat
Wie in dem Schulhaus do.

Wie heemelt mich do alles a'!
Ich schteh, un denk, un guck;
Un was ich schier vergesse hab,
Kummt widder z'rick wie aus siem Grab,
Un schteht do wie en Schpuck!

Des Krickle schpielt verbei wie's hot,
Wo ich noch g'schpielt hab dra';
Un unner selle Hollerbisch
Do schpiele noch die kleene Fisch,
So schmaert wie selli Zeit.

Der Weisseech schteht noch an der Dhier --
Macht Schatte iwwer's Dach:
Die Drauwerank is ah noch grie' --
Un's Amschel-Nescht -- guk juscht mol hi --
O was iss dess en Sach!

Die Schwalme schkippe iwwer's Feld,
Die vedderscht is die Bescht!
Un sehnscht du dort am Giebeleck
'N Haus vun Schtopple un vun Dreck?
Sell iss en Schwalme-Nescht.

Die Junge leie allweil schtill,
Un schlofe alle fescht.
Ward bis die Alte kriege Werm
No'd herscht du awwer gross Gelerm --
Vun Meiler in dem Nescht!

Ja, alles dess iss noch wie's war
Wo ich noch war en Buh;
Doch anner Dings sin net meh so,
For alles dhut sich ennere do
Wie ich mich ennere dhu.

Ich schteh wie Ossian in seim Dhal
Un seh in's Wolkenschpiel, --
Bewegt mit Freed un Trauer -- ach!
Die Dhrene kumme wann ich lach!
Kanscht denke wie ich fiehl.

Do bin ich gange in die Schul,
Wo ich noch war gans klee';
Dort war der Meeschter in seim Schtuhl,
Dort war sei' Wip, un dort sei' Ruhl, --
Ich kann's noch Alles seh'.

Die lange Desks rings an der Wand --
Die grosse Schieler drum;
Uf eener Seit die grosse Maed,
Un dort die Buwe net so bleed --
Guk, wie sie piepe rum!

Der Meeschter watscht sie awwer scharf,
Sie gewe besser acht:
Dort seller, wo Lofletters schreibt
Un seller, wo sei Schpuchte treibt,
Un seller Kerl wo lacht.

Die Grosse un die Kleene all
Sin unner eener Ruhl;
Un dess iss juscht der rechte Weg:
Wer Ruhls verbrecht, der nemmt die Schleg,
Odder verlosst die Schul.

Inwennig, um der Offe rum
Hocke die kleene Tschaeps,
Sie lerne artlich hart, versteh,
Un wer net wees sei A B C --
Sei' Ohre kriege Raepps.

'S iss hart zu hocke uf so Benk --
Die fiess, die schteh'n net uf --
En Mancher kriegt en where Rick
In sellem Schulhaus an der Krick,
Un fiehlt gans krenklich druff.

Die arme Drep! dort hocke se
In Misserie -- juscht denk!
Es iss kee' Wunner -- nemm mei Wort --
Dass se so wenig lerne dort,
Uf selle hoche Benk.

Mit all was mer so sage kann,
War's doch en guti Schul;
Du finscht keen Meeschter so, geh, such --
Der seifre kann darch's ganze Buch,
Un schkippt keen eeni Ruhl.

Bees was er! ja, dess muss ich g'schteh;
G'wippt hot er numme zu;
Gar kreislich gute Ruhls gelehrt
Un wer Schleg kriegt hot, hen se g'heert,
Hot eppes letz gedhu'.

Wann's Dinner war, un Schul war aus,
Nor'd hot mer gut gefielt;
Dheel iss 'n Balle-Gehm gelunge,
Dheel hen mitnanner Rehs g'schprunge,
Un Dheel hen Sold'scher g'schpielt.

Die grosse Maed hen ausgekehrt --
Die Buwe nausgeschtaabt!
Zu helfe he en Dheel pretend,
Der Meeschter hot sie naus gesendt:
Die Ruhls hen's net erlaabt.

Die kleene Maed hen Ring geschpielt
Uf sellem Waasum da;
Wann grosse Maed sin in der Ring --
'S iss doch en wunnervolles Ding! --
Sin grosse Buwe ah!

Die Grosse he die Grosse 'taggt,
Die Kleene all vermisst!
Wie sin se g'schprunge ab un uf,
Wer g'wunne hot, verloss dich druf,
Hot dichdiglich gekisst!

Am Chrischdag war die rechte Zeit --
Oh wann ich juscht dra' denk!
Der Meeschter hen mer naus geschperrt,
Die Dhier un Fenschter fescht gebaerrt --
"Nau, Meeschter, en Geschenk!"

Nor'd hot er awwer hart browirt,
Mit Fors zu kumme nei',
Un mir hen, wie er hot gekloppt,
'N Schreiwes unne naus geschtoppt,
"Wann's seinscht, dann kannscht du rei!"

Nau hot der Meeschter raus gelaenst,
Gar kreislich schiepisch 'gukt!
Eppel un Keschte un noch meh",
'S war juschtement in faect recht schee',
Mir hen's mit Luschte ge'schluckt.

Oh wu sin nau die Schieler all,
Wo hawe do gelernt?
'N Dheel sin weit ewek gereest,
Vum Unglick uf un ab gedscheest,
Dheel hot der Dodt geaernt!

Mei Herz schwellt mit Gedanke uf,
Bis ich schier gar verschtick!
Kennt heile, 's dhut m'r nau so leed,
Un doch gebt's mir die greeschte Freed,
Dess Schulhaus an der Krick.

Gut bei! alt Schulhaus -- Echo kreischt
Gut bei! Gut bei! zurick;
O Schulhaus! Schulhaus! muss ich geh',
Un du schtehscht nor'd do all allee',
Du Schulhaus an der Krick!

Oh horcht, ihr Leit, wu nooch mir lebt,
Ich schreib eich noch des Schtick:
Ich war eich, droh eich, gebt doch Acht,
Un nennt uf immer gut enacht,
Des Schulhaus an der Krick!

[From Harbaugh's Harfe, Gedichte in
Pennsylvanisch-Deutscher Mundart
,
von Heinrich Harbaugh; Herausgegeben
von B. Bausman, Reformed Church
Publication Board, Philadelphia, 1870.]

Return to Pennsylvania German page.

Return to Dr. Boyer's home page.